2025-03-22
HomeEmakumeakJardunaldiaSexu langileei ahotsa emango diegu Gasteizen, ostegunean egingo ditugun jardunaldiak direla eta

Sexu langileei ahotsa emango diegu Gasteizen, ostegunean egingo ditugun jardunaldiak direla eta

Ipar Hegoa Fundazioarekin elkarlanean, LAB sindikatuak sexu-lanari buruzko jardunaldiak egingo ditu urriaren 24an, Gasteizen, Aldabe Gizarte Etxean, 10:00etatik 14:00ak bitartean, “Sexu lana: kriminalizazioa edo aitortza” izenburupean.

“Langileria zeintzuk osatzen dugun erabakitzea guri dagokigu”. Hitzez hitz, horrela jasoa geratu zen LABen 9. Biltzar Nagusian gure erabaki nagusietako bat; klase subjektu berria osatzeko gure konpromisoa, alegia. Luze eta zabal aritu ginen langile klasea zatitzeko kapitalaren estrategiari buruz, eta lanaren ikuspegi integralari erreparatzeko beharra azpimarratu genuen. Langileria ulertzeko kontzepzio klasikoa -eta murritza- aldatu, gainditu, eta beste parametro batzuetan kokatzeko erabakia hartu genuen, langileriaren definizio zabal, anitz eta integratzaileago bati ateak zabalduz.

Lanaren ikuspegi integralago horren baitan, izan nekazari edo kooperatibista, edo bere lan indarraz bizi den autonomoa, izan kaleko saltzaile, etxeko langile edota sexu langile, denok gara langileak, denok osatzen dugu Euskal Herriko langileria. Langile subjektu zabal eta anitz horri borrokarako eta antolakuntzarako proposamenak egiteko konpromisoa hartu genuen orduan, eta bide horretan etengabe ari gara urratsak ematen geroztik.

Bide horren logikan beste pauso bat ematera goaz datorren urriaren 24an, Gasteizen. Euskal Herriko langileriaren parte diren sexu langileak zein egoeratan dauden eta zer eskatzen duten jakin nahi eta behar dugu. Sexu langileak subjektu politikoak bezala ere aitortzen ditugu, eta, horregatik, beren ahotsa entzutea ezinbestekoa da guretzat. Ez dugu haien ordez hitz egingo, haiei hitza eman eta entzun egingo diegu.

Jakinda prostituzioari buruzko eztabaida zabala eta konplexua dela, badirela bi errealitate ongi bereizi beharrekoak -prostituzioa eta trata- eta badirela prostituzioari buruzko jarrera ezberdinak -debekatzailea, abolizionismoa, erregularizazioaren aldekoa, despenalizazioaren aldekoa, eskubideen aldekoak-, jakinda ere prostituzioa ezin dela aztertu testuinguru kapitalismo heteropatriarkala kontuan izan gabe… hori guztia jakinda, sexu langileek pairatzen duten estigma gainditu eta haien egoera hobetzeko antolatzea ezinbestekoa dela ulertzen dugu. Hori horrela, sexu langileekin zer nolako aliantzak sortu hausnartu eta eztabaidatzeko gogoeta prozesua abian dugu LABen eta urriaren 24an izango dugu hurrengo hitzordua. Sexu langileek ere modu autonomo, burujabe eta duin bat izan dezaten, LABen ekarpena zein izan behar duen definitzera goaz.

 

 

 

AZKEN ALBISTEAK | ÚLTIMAS NOTICIAS

LABek Sunsundeguin ekintzara pasatzeko deia egiten du

Une honetan 300 lanpostu baino gehiago daude jokoan Altsasun; etorkizunerako estrategikoa dirudien sektore batean, merkatua duen produktu batekin. Sunsundegui azaroaren 5ean borondatezko hartzekodunen konkurtsoan sartu zenetik 4 hilabete betetzera doazenean, legezko epeak erretzen joan dira. Oraindik ez da zehaztu balizko inbertsore baten aukerak aurrera egingo duen ala ez.

LABek Hezkuntza Saileko sukalde eta garbiketako langileen hitzarmena sinatu du 16 urteren ondoren

Azken urteetan hamaika mobilizazio, greba, salaketa egin ditugu Hezkuntza Saileko kolektibo feminizatuenaren eta lan baldintza prekarioenak dituenaren lan baldintzak errespetatu eta hobetu daitezen. Pribatizazio prozesu bortitzena jasan duen sektorea da, zerbitzuetako lan batzuk azpikontratatuta baititu sailak.

Premiaz, Palestinaren alde kalera

LABek bat egiten du Gernika-Palestinak deituta bihar 17:30ean Donostian egingo den manifestazioarekin.