Tenerías Omega 79 langile dituen eta behi-larrua ekoizten dituen Lizarrako enpresa bat da. Duela bi aste baino gehiago, enpresako zuzendaritzak, bere abokatuarekin eta konkurtso Administrazioarekin batera, premiazko bilera batera deitu zuen enpresa-batzordea, eta bertan adierazi zien lantoki horretarako irtenbide bakarra likidatzea zela, eta, ondorioz, langile guztiak kaleratzea.
Bilera horretan, alde sozialari jakinarazi zioten zein garrantzitsua zen legezko epe guztiak bizkortzea eta ahalik eta gehien laburtzea, lehenbailehen enpresak dirua galtzeari utz ziezaion langileen kotizazioak ordaintzeagatik, irailaren 2tik aldi baterako enplegu-erregulazioan baitaude. Horretarako, zuzendaritzak enplegu-erregulazioko espedientearen akordio proposamen bat aipatu zuen, eta adierazi zuen ahalik eta lasterren bidaliko ziola batzordeari, hark azter zezan.
Bi astez zain egon ondoren, joan den asteartean, urriaren 1ean, zuzendaritzak bilera egin zuen berriro batzordearekin, proposamen hori eskura emateko, eta, aldi berean, langileentzat EEEa adostasunez sinatzea zein garrantzitsua zen adierazten saiatu ziren.
Enplegu-erregulazioko espedientearen akordiorako proposamenean, enpresako zuzendaritzak ez die plantillaren ordezkariei legez bermatuta duten guztia besterik eskaintzen, hau da, “beren lanpostuak azkentzea, zerbitzu-urte bakoitzeko 20 eguneko kalte-ordain ekonomikoa ezartzea adostuta, urtebetetik beherako aldiak hilabeteka hainbanatuta, eta gehienez ere 365 eguneko soldatarekin”.
Halaber, adierazi zieten enpresak ez zuela inolaz ere bere gain hartuko kaleratzeengatiko kalte-ordainen ordainketa, eta betebehar hori, hasiera batean enpresarena dena, FOGASAk hartu beharko lukeela bere gain. Horrela, langile batzuek ez dute dagokien guztia kobratuko, FOGASAk mugak aplikatzen baitizkie bai soldatei bai kalte-ordainei.
Hala ere, behin eta berriz esan zioten batzordeari kaleratzeekin ados zegoela sinatzeko, eta txintik atera gabe onar zezala plantillaren zati handi batek bizitza osoan lan egin duen enpresaren itxiera. Batzordeak salatu duenez, “gure duintasuna saltzearen truke, FOGASAtik kalte-ordaina lehenbailehen kobratuko dugula agintzen digute”, eta “gure irteera adostasunez sinatzen ez badugu, iradoki digute ez dutela hainbesteko presarik izango gestioak lehenbailehen egiteko… Kaleratzeaz gain, xantaia egiten saiatzen dira, kaleratzeekin ados egon gaitezen”.
Batzordeak, gehiengoz, erabaki hori baztertzea erabaki du. Gainera, konkurtso-administrazioaren jarrera salatu du, zuzendaritzaren aliatu gisa jarduten ari baita, negoziatzen ere uzten ez dion akordio bat sinatu behar dela azpimarratuz, langileentzako inolako onurarik ez dakarrena, baina bai enpresarentzat.
Urte honen hasieratik zuzendaritzak egindako kudeaketa ere salatu du. “Ez dakigu ondo bere asmoa amaiera hori behartzea zen ala, besterik gabe, gidari lanak egiten ari zen pertsona botoi guztiak batera sakatzen ari zen… Galdera hau da: eman den edo sortu den egoera baten aurrean gaude…? Argi daukagu zuzendaritzak ez duela inolako zintzotasunik erakutsi”, adierazi du enpresa-batzordeak.
Batzordeak gogorarazi du ekainean hasi zirela tramitatzen 13 langilerentzako aldi baterako enplegu-erregulazio bat. ABEEE bat, negoziazio-epeak luzatzea erabaki zuten arren, azkenean zuzendaritzak atzera bota zuena. Horren ordez, zuzendaritzak, enpresa-batzordeari horren berri eman gabe, hartzekodunen konkurtsoa eskatu zion merkataritza-epaitegiari. Ondoren, ABEEE berri baten tramitazioaren hasiera aurkeztu zion batzordeari, oraingoan plantillaren % 100arentzat. Eta geroago, zuzendaritzak ABEEE hau negoziatzea proposatu zuen langileak oporretan zeuden bitartean.
Batzordearen ustez, proposamen hori inposizioa da; izan ere, negoziazio-datak aldatzeko eskatu arren, enpresak “negoziazioa” eragin zuen, eta enpresako zuzendaritzak baino ez zuen parte hartu honetan.
Zuzendaritzak irailaren 2tik aurrera aplikatu zuen ABEEEa. Eta hartzekodunen konkurtsoa hasteko eskaerari dagokionez, eskatu eta hilabetera arte ez zion zuzendaritzak enpresa-batzordeari jakinarazi egoera horretan zeudela “eta gure gain hartu behar genuela eta geure kaleratzea sinatu behar genuela, azkar eta txintik atera gabe…”, gaineratu du batzordeak.
Egoera horren aurrean, enpresa batzordeak honakoa adierazi du: “ez dugu amore emango, ezta gutxiago ere. Borrokan ari gara Tenerias Omegaren itxieraren aurka eta gure lanpostuen defentsaren alde”.