Eguna historikoa izan da berriro, hirugarren greba eguna multinazionalaren Trapagarango lantokian, urriaren 17ko lanuzteen eta azaroaren 28ko egun osoko grebaren ondoren. Berriro ere, Amazonen azpikontratetako 300 furgoneta baino gehiago ez dira kaleetara atera banaketa lanak egitera, biltegiko langile gehienek bat egin dutelako LABen greba deialdiarekin. Gaur, enpresak 25.000 paketeko atzerapena pilatu du eta bihar, aurreikuspenen arabera, 35.000 pakete ez dira banatuko. Beraz, bi egunetako grebaren ondorioz, 60.000 pakete banatzeke geratuko dira. Grebalariek kalejira egin dute gaur Bilbon, Plaza Eliptikotik Zirkularreraino. Bihar, abenduaren 23an, aste honetako bigarren greba egunean, Trapagarango lantokiaren aurrean mobilizatuko dira 8:00etatik aurrera.
Gaurko greba eguna arrakastatsua izan dela esan dezakegu, eta horren isla garbia izan da Amazoneko 6 azpikontratek (Vayven Delivery, S.L., E-Box Last Mille, S.L., Flash Delivery, S.L., Besaide Logistics, S.L., City Logistic, S.L. eta Grusar Logistica y DistribucciĆ³n, S.L.) banatzaileei etxean geratzeko agindu dietela.
Joan den astelehenean, abenduaren 19an, Amazon enpresa-batzordearekin batzartu zen eta ez zuen ezer esanguratsurik eskaini. Zentroko hitzarmen bat egitea bideragarria ez dela adierazi zuen eta negoziazioa hautsitzat joz altxatu zen. Eskaintzen duten gauza bakarra asteburuetako atsedenaldiak hobetzea da, eta LABentzat hori ez da nahikoa. Hori gutxi balitz, atzo gauean, enpresak plantillari mehatxuzko mezua bidali zion, segurtasun pribatua handituko zuela eta Ertzaintzaren presentzia handiagoa eskatu zuela esanez. Mehatxuak mehatxu, lehen greba eguna arrakasta bat izan da.
Biharko beste greba egun bat dago deituta, eta espero dugu enpresa zuzendaritzak, erantzukizunez jokatuta, bere jarrera birplanteatzea eta negoziazioaren alde egitea. Bestela, langileei uzten dien aukera bakarra mobilizazioa da.