LAB
sindikatuak
bat
egiten
du
burujabetza
ekonomiko
eta
politikoaren
alde
Ezker
Abertzaleak,
Aralarrek,
EAk
eta
Alternatibak
larunbat
honetarako
deitutako
protestekin.
Maila
sozialean
eta
laboralean
(erreformak,
murrizketak…),
Madrildik
datozen
eraso
guztiek
gidoi
berari
erantzuten
diote,
denek
dakarte
sistema
kapitalistaren
sakontzea.
Sistemak
aurrera
egin
ahala,
gure
egoerak,
langileon
baldintzek
okerrera
egiten
dute.
Krisialdiaren hasieratik esaten ari gara egoera honetatik irten ahal izateko bide bakarra dagoela: bestelako eredu ekonomiko eta sozial bat eraikitzea. Espainiar Estatuak bere aukeraketa egin du, ez dauka asmorik, ez beharrik, bide hori jorratzeko. Azken hiru urtean krisialdiaren aitzakiaz baliatzen ari dira, eta “krisiaren kontrako” omen diren neurriak bata bestearen atzetik ezarriz, egoera okertu besterik ez dute egin. Betiko bidean sakonduz emaitza ere betikoa izango da. Hor ez dago irtenbiderik, ez bestelako eredurik.
Euskal Herriak eta euskal langileok ez daukagu etorkizunik Estatu espainiarrean. Hondora doa, eta berarekin batera hondoratu egin nahi gaituzte. Hala ere, Euskal Herriak gaitasuna badu bestelako eredu bat eraikitzeko.
Horretarako ahalmena da orain Euskal Herriak behar duena. Eredu ekonomiko eta sozial hau aldatzea posible da, baina horretarako Euskal Herriak burujabetza politiko eta ekonomikoa behar du. Euskal Herriak tresna politiko eta ekonomikoak behar ditu bere etorkizuna bermatzeko.
Gaur eredu sozialaren eraldaketa ezinbestean dago burujabetzaren borrokarekin lotuta. Burujabetza politiko eta ekonomikoa merkatuen eta estatuen aurrean. Ezinbestekoa da. Burujabetzak ez du berez ziurtatzen beste eredu bat, baina burujabetzarik gabe ezinezkoa da beste eredu bat eraikitzea. Erabakitzeko eskubidearen defentsa indartu behar dugu, gero eta indar gehiago bildu eta marko juridiko politiko berri baten eraikuntzan pausoak egin. Manifestazio hauek ildo horretan kokatzen ditugu.
Langileoi dagokigunez, ezinbestekoa da lan harremanetarako eta babes sozialerako euskal esparrua eraikitzea. Horixe da modu bakarra Madriletik datozen inposaketei aurre egiteko, alegia, berton erabakitzea zeintzuk izan behar diren gure lan harremanak eta gure babes sozialerako sistema.
Lehentasunezkoa da. Ez da aldarrikapen hutsa. Gaurtik, instituzioetatik, ekimen politikoetatik, ekimen sozialarekin, ekimen sindikalarekin eta mobilizazioaz egin behar den bide bat da. Datozen murrizketa eta erreformen aurrean salaketa hutsa egiteak ez digu euskal langileoi ezer konpontzen, salaketaren ostean erreformek uzten diguten zelaia besterik ez bazaigu geratzen. Beraz, erantzuna gure esku dagoelako, burujabetza ekonomiko eta politikoaren alde larunbatean Bilbon, Gasteizen, Donostian eta Iruñean egingo diren manifestazioetan parte hartzeko deia luzatzen diegu LAB sindikatutik euskal herritarrei orohar, eta langileei bereziki.
Euskal Herrian, 2012ko otsailaren 7an