Atzo, uztalilak 3, bi lan istripuren berri izan genuen. NERVACERO eta ARCELOR MITTAL SESTAO enpresetan izandakoak hain zuzen ere. LAB sindikatuak haien sendi, lankide eta gertuko guztiei elkartasuna adieraztearekin batera, Montajes Jauregi enpresa batzordeak, astelehenean, hilak 6, 16.30etan, Arcelor Mittal enpresaren sarreran egingo duen elkarretaratzean parte hartzeko deia luzatzen du.
Bestetik, lan istripu baten ondorioz langile bat hil dela salatu behar dugu. Oraingoz informazio gutxi dugu. Sestaon, ARCELOR MITTAL enpresan izan da istripua eta azpikontratako langilea zen, MONTAJES JAUREGI enpresakoa. Istripua galdaketa jarraituan segmentuen aldaketa egiterako garaian eman da, langilea harrapatuta geratu da. Lan hau enpresaren produkzioarekin erabat loturik dago eta hala ere azpikontraturik dago.
Azken lan istripu honekin jadanik bi dira aste honetan Arcelorren izandako heriotz istripuak. Betiko moduan, azpikontrata bateko langilea zen, irabazi itzelak dituen multinazional batentzat lanean ari zen azpikontrata batean. Egoera honek garbi erakusten du gertatzen ari dena; irabazi enpresarialak langileon osasunaren eta bizitzaren gainetik jartzen dituzte. Izan ere, Arcelor berak maiatzean lortutako irabaziak publiko egin zituen: 2015 lehen hiruhilabetean 546 milioi euroko irabaziak izan ditu, aurreko urtean 443 izan ziren garai berdinetan, hau da, irabaziak %40 egin du gora.
Aspalditik salatu dugu NERVACEROn eta ARCELOR MITTALen gertatzen ari dena: lan istripuak izkutatzen dituzte eta azpikontratazioa hedatzen ari dira. Gero eta gehiago azpikontraten bidez egiten diren produkzioko lanak. Hori gutxi izango balitz, ezaguna da azpikontratazioa langileen zatiketa eta lan baldintzen prekarizazioa bultzatuz gutxi batzuen irabaziak bermatzeko sistema kapitalisma honek asmatu duen formula dela. Enpresa nagusiaren kezka bakarra, etekinak handitzea da, ez dute inolako erantzunkizunik hartzen azpikontratetako langileekiko.
Modu berean gogor salatu nahi dugu heriotz berri honekin, Euskal Herrian 2015ean gutxienez 32 langile hil direla. Azken hilabeteetan lan isturipuek gorakada nabarmena izan dute, 12 hildako hilabete batean. Zoritxarrez, bagenekien eta aspaldi salatu genuen egoera hau etorriko zela, azken urteetan eman den istripu indizeen beherakada ez baitzen prebentzio neurri gehiago hartu izanaren ondorio. Betidanik salatu egin dugu erreformaz erreforma, lan harremanak suntsitu dituztela, prekarietatea neurri gabe hedatzen ari dela eta noski honek eragin zuzena duela lan istripuetan. Lanera joatea, langile askorentzat, bizitza arriskuan jartzea da eta hau onartezina da.
Berriki Angel Toñak esan du “badirudiela” lan istripuen atzean prekarietatea dagoela. “Badirudiela” ez, oso ongi daki inposatu zaigun lan harreman eredu honen ondorioak zeintzuk diren. Heriotzera kondenatzen gaituen eredu bat da, eta kasurik hoberean bizitza duina ezinezko egiten duten baldintzetan bizitzera.
Horregatik, gure ustez, Nafarroako Gobernuak zein Eusko Jaurlaritzak ezin dute beste aldera begiratzen jarraitu, paperean geratzen diren planak egiten jarraitu. Erabaki politikoak hartu behar dituzte egungo lan harreman eredua errotik aldatzeko.
Hau guztia dela eta, LABek mobilizatzen jarraituko du, langile zein jendartearen odolhuste hau geldiarazteko. Hala, Montajes Jauregi enpresa batzordeak, astelehenean, hilak 6, 16.30etan, Arcelor Mittal enpresaren sarreran egingo duen elkarretaratzean parte hartzeko deia luzatzen du LABek.