LAB sindikatuko koordinatzaile orokorrak lantokietan, kalean eta erakundeetan borrokatzearen aldeko deia egin du Maiatzaren Lehenean
Gaur, LAB, Euskal Herriko sindikatu nazionala, Euskal Herri osoan mobilizatu da. Igor Arroyo koordinatzaile orokorrak egin du eguneko diskurtsoa, Bilbon egindako manifestazioaren ostean. Bizkaiko hiriburuan ez ezik, Baionan, Gasteizen, Donostian, IruƱeak, Maulen, Eibarren eta Tuteran ere atera da kalera sindikatua. Aipagarria da Lapurdiko hiriburuaren kasua; izan ere, intersindikalean bizi duen bazterketa egoerari aurre eginez, manifestazio bateratuan bere tokia aldarrikatuz hasi du mobilizazioa LABek, ondoren bere ekitaldi propioa egin duelarik amaieran. Euskal Herritik kanpo ere, LABen ordezkaritza bat parte hartzen ari da, urtero legez, Kubako CTC sindikatuak antolatutako ekitaldietan.
Presoak gogoan izanez hasi du hitzartzea Arroyok: āEuskal preso guztiak Euskal Herrira ekartzea lortu du herri honek. Eta hurrengo erronkari helduko diogu orain: Euskal preso guztiak etxera!ā
Munduko Federazio Sindikaleko kideei ere egin die keinu koordinatzaile nagusiak, independentismoa eta internazionalismoa elkar lotuta ulertzen baititu LABek: āMundu berri bat nahi dugu, non herri guztiak libre eta pareko izango diren; Mundu berri bat non pertsona guztiak libre eta pareko izango direnā.
āHorregatik, gaur, munduko txoko desberdinetatik Euskal Herrira datozen langile horiek antolatu eta defendatzeko gure erronka berresten dugu. Gure konpromiso antirrazista berresten duguā, adierazi du Igor Arroyok.
LABen bozeramaleak nabarmendu du langile klasea lan- eta bizi-baldintzetan murrizketa berriak jasaten ari dela. Krisia, pandemia edota gerra aitzakiatzat hartu eta langile klasearen kaltetan ākapitalaren diru-goseaā asetzeko murrizketak lirateke horiek guztiak, adierazi duenez.
Hala ere, Euskal Herriko langileek aurrerapausoa eman dutela nabarmendu du Arroyok. Izan ere, sindikatuak duela urtebete esan zuen borroka-fase berri bat ireki behar zela. āEta gaur, esan dezakegu borroka-fase hori ireki delaā, baieztatu du. Datuek ere hala berresten dute, estatu espainiarrean egin diren greben erdia baino gehiago Hego Euskal Herrian egin baitira. Horien atzean dauden pertsonak, ahalduntze-prozesuak, antolaketa eta ekintza sindikala goratu ditu koordinatzaile orokorrak: āLABeko jendeak badaki aldaketak ez direla Elkarrizketa Sozialerako Mahai batetik etorriko, borrokatik baizik. Aldaketak ez direla Madrildik etorriko, Euskal Herritik baizik. Euskal Herrian eta sektore bakoitzean dauden gehiengo sindikalak errespetatu behar direlaā.
Euskal sindikalismo berria
āEsan genuen sindikalismoa birpentsatu beharra zegoela, sektore prekarizatuengana gerturatu behar zela. Eta horretan ari garaā, azaldu du Arroyok. Sindikalismo sozialaren bidea ere urratzen dihardu LABek, eta, horrekin lotuta, mugimendu feministak deitutako Greba Orokor Feministarekin bat egin du.
Lan baldintzak hobetzeaz harago, eredua bera lehiatu nahi du LABek, Madrilen eta Parisen posible ez diren aldaketak Euskal Herrian gauzatzeko asmoz. Euskal Errepublika eraiki nahi duen esparru sindikal, sozial eta politikoa artikulatzeko helburua lortzeko lanean jarraituko du, beraz.
āLangile klasea herri honetako gehiengo soziala gara. Baina politika publikoak ez dira errealitate hori kontuan hartuta egitenā, gogorarazi du Igor Arroyok. Patronalaren lobbyek politika ekonomikoak etengabe baldintzatzen dituzten honetan, langile klasearen boterea baliatzeko premia nabarmendu du: āAreagotu dezagun banaketa hirukoitzaren aldeko presioa: enpleguaren, zaintzaren eta aberastasunaren banaketaā.
Langile borroka espazio guztietara
Hala, agenda politikoaren erdigunean jarri beharreko hainbat gai zerrendatu ditu, hala nola astean 30 orduko lanaldia, 1.400 euroko gutxieneko soldata nahiz 1.080 euroko gutxieneko pentsioa, zaintza-, osasun-, hezkuntza- eta etxebizitza- sistema publikoak eta ākapitalak zergak behingoz ordaintzeaā ahalbidetuko duen erreforma fiskala.
Bide horretan, esparru guztiak lehiatzearen garrantzia aipatu du: āBorroka dezagun lantokietan. Borroka dezagun kalean, eta borroka dezagun erakundeetan ereā.
āBeste mundu bat egin nahi dugu, beste mundu bat egiten ari garaā, aipatu du amaitzeko, aurtengo deialdiaren leloari erreferentzia eginez, eta ekintza bakoitzak balioa duela nabarmendu nahi izan du, guztion ekarpena baita garrantzitsua.