2025-04-22
HomeIndustriaMetalgintzaSiemens-Gamesako sei mila langilek pairatuko dute gutxi batzuen diru gosea

Siemens-Gamesako sei mila langilek pairatuko dute gutxi batzuen diru gosea

Siemens-Gamesak ez du garrantzitsuena azaldu. Nola liteke bi enpresa erraldoik bat egin eta 6 hilabetera Gamesaren kasuan salmenta, errentagarritasun eta irabazi errekorrak egin ostean, orain 6.000 langile kaleratzea mundu osoan?

Atzo Siemens-Gamesako zuzendaritzak eta sindikatuek izandako bileraren ondorenean, honakoa adierazi nahi du LABek:

Atzoko bileran Gamesa-Siemenseko zuzendaritzak langileak eta iritzi publikoa lasaitu nahi baldin bazituen, ez zuen inondik inora bere helburua lortu. Espainiako estatuan kaleratutako langileen kopurua orotara 408 izango dela jakinarazteaz gain, ez zuen zehaztu zer langile kaleratu nahi dituzten, ezta zer lantokitan egin nahi dituzten kaleratzeak. Hauek burutzeko prozedura ere ez zuten azaldu, ezta zer arrazoi argudiatuko duten kaleratze hauek egiteko.

Gainera, salatu nahi dugu komunikabideek bileraren aurretik jakin zutela gero bileran langile ordezkariei jakinarazitakoa. Onartezina da.

Zuzendaritzak era orokorrean aipatu zuen kaleratzerik ez zela egongo lantoki “produktiboetan”. Hortaz, ulertzen dugu beste lantokietan kaleratzeak egingo dituztela, I+G eta bulegoetako lan zentroez gain, zerbitzu enpresak deitzen dituzten horietan, adibidez, logistikaz arduratzen den Arazuriko lantegian (Nafarroan).

LAB gainera oso kezkatuta dago Siemens-Gamesako langile guztien etorkizunarekin. Enplegu zuzenean izango duen eragina publikoki azaldu da, baina azpikontratazio kate osoan izango duen eragina ere handia izango da.

Nola baimentzen da horrelakorik Europako legeriaren baitan? Zergatik ez da dimisiorik egon? Dakigun bakarra da gutxi batzuk 1.047 miloi euro banatu dituztela eta aldiz, 6.000 langile kalera joango dela momentuz.

Azkenik, Eusko Jaurlaritza eta Nafarroako Gobernuaren jarrera salatu nahi dugu, biek bat egin baitute eraginak gutxiesteko diskurtsoarekin. Ez gara ari krisian dagoen enpresa batetaz, hazten ari ziren bi enpresa erraldoietaz baizik. Eta instituzio horiek, duela hilabete gutxi batzuk, txalotu egin zuten bategitea “hazkunde handiagoa ekarriko baitzuen”. Krisi baten aurrean gaude bai, baloreen krisia hain zuzen ere, milaka langileren langabeziaren kontura aberasten direnean, instituzioen babes inplizituarekin. Eta langileok, beste behin, bakarrik gaude eraso honen aurrean.

LABek ez du kaleratzerik onartzen eta berauen aurrean borroka egingo du.

 

 

AZKEN ALBISTEAK | ÚLTIMAS NOTICIAS

Enviserreko langileek greba gogortu dute, protestaren hirugarren astean

Hiriko parkeak, lorategiak eta eraztun berdea mantentzeko Gasteizko Udalaren kontrata den Enviser enpresako langileek hiru aste bete dituzte greban. Baldintza duinak jasoko dituen hitzarmen propio bat lortzea da beren helburua. Hainbat langilek Gasteizko udaletxearen aurrean pasa dute gaua, azken honen inplikazioa eskatzeko.

LABek ontzat jo du Iruñeko Udalaren eta alokairuzko bizikleten enpresaren artean sinaturiko akordioari esker langileei zor zitzaizkien soldatak ordaintzea

LAB sindikatuak duela bi aste salatu zuen Ride On Pamplona Iruñeko alokairuko bizikleta elektrikoen zerbitzuko langileak egoera larrian zeudela, sei hilabete baitzeramatzaten nominak berandu kobratzen eta, gainera, enpresak bi nomina oso zor baitzizkien. Iruñeko Udalak eta Ride On-ek gaur iragarri duten akordioaren arabera badirudi zerbitzuaren jarraipena bermatuko dutela eta enpresak berehala kitatuko dituela langileekin dituen zorrak.

LABek salatzen du milaka gutun banatu gabe daudela Gasteizen Correoseko langile faltagatik

Langilerik ez kontratatzearen ondorioz, kaosa sortu da azken hilabeteetan posta-banaketan, eta inoiz ikusi gabeko egoetara iristen ari da. Kontratazioan murrizketa hain handia da, kasu askotan ez dela inor ordezkatzen ari. Adibidez, Alde Zaharreko postariak urte erdi baino gehiago darama bajan, ordezkatu gabe.