Bihar beste hitzordu bat izango dugu, 18:30ean Pasai Antxoko Biteri plazan, Euskalgintzaren Kontseiluarekin eta Bokale elkartearekin batera. Izan ere, azkenaldian bizi izaten ari garen oldarraldi judizialaren enegarren epai honek bigarren mailako hizkuntzatzat jotzen du euskara, eta LABek ez du halakorik onartuko.
Jarraian irakur daiteke Pasaiako Udalaren aurrean gaur eguerdian eginiko elkarretaratzean irakurritako adierazpena:
EUSKARAREN AURKAKO OLDARRALDIARI EZ!
EUSKARAZ LAN EGITEKO ETA BIZITZEKO ESKUBIDEA ALDARRIKATZEKO GAUDE HEMEN
Euskal langileok Euskal Herrian euskaraz lan egiteko eta bizitzeko dugun eskubidearen aurkako oldarraldirik ez dugu onartuko, lanerako dugun eskubidea eta gure herrian euskaraz bizitzeko duguna ez baitira kontrajarriak, osagarriak baizik. Ildo horretan, ez dugu ontzat emango Pasaiako Udalean kale-garbitzaile lanpostuetan gutxieneko euskara mailaren ezagutza kentzeko kaleratu diren ebazpen judizialak.
Deialdiaren oinarrietan ezarritakoaren arabera, kale-garbitzaile izateko beste hainbat eskakizunen artean, euskarazko B1 (1. hizkuntza eskakizuna) maila ezarri zen 2015. urtean. Bada, epaiei jarraikiz, diskriminatzailea da euskararen gutxieneko eskakizun hori ezartzea, argudiatzen baita lanpostu publikoetara baldintza beretan iristeko oinarrizko eskubidea urratu egiten dela.
Baina zergatik da diskriminatzailea gutxieneko euskara maila bat eskatzea eta ez deialdiaren oinarrietan ezartzen diren gainerako eskakizunak eskatzea? Udaleko langile guzti-guztiek ordezkatzen dute Udala, kalean dabiltzanek nahiz bulegoetan dihardutenek. Guztiak dira Udalaren ispilu. Eta herritar guztiek dute herri administrazioarekin nahi duten hizkuntza ofizialean harremanak izateko eskubidea. Ezinbestean, beraz, herri-langileen betebeharra da eskubide hori muga edo trabarik gabe betetzen dela ziurtatzea, kontuan izanda langile bakoitzak bere lanpostuari dagokion hizkuntza-eskakizunaren arabera jardungo duela.
Euskararen erabilera sustatzeko eta euskararen normalizazioa planifikatzeko Udalari legez ezarri zitzaion eskumena baliatuz, urteak daramatza Udalak erakundea bera zein udalerria euskalduntzeko planak bideratzen, eta horretarako, langileei dagokien hizkuntza eskakizuna lortzeko baliabideak eskaintzen.
Hortaz, lege arloan ez dugu ulertzen azken 40 urteotan indarrean egon den Euskara Legea, eta lege hori garatzeko dekretu guztiak gehi 2/2016 Legea, Euskadiko Toki Erakundeei buruzkoa, normaltasunez bideratu direnean, horiek aldatu gabe orain sekulako oldarraldi juridikoan murgildu izana. Legeak onartu badira, zergatik jotzen dute epaileek lege horien kontra? Ez al dira ba gehiengo zabal batez onartu? Zer aldatu da? Ondorio linguistikoak dituen inboluzio politiko zabalagoaren baitan dago erantzuna. Erabat antidemokratikoa da, euskaraz lan egiteko eta bizitzeko eskubidea zapuztea legaltzat jotzen bada ere.
Gauzak horrela, bost dei egin nahi ditugu gaur:
1.- Pasaiako Udalari errekurtsoa jartzeko eta egonkortze-prozesuarekin aurrera egiteko eskatzen diogu, Lanpostuen Zerrendan onartutakoa errespetatuz. Horrekin batera, eskatzen diogu euskara maila hobetzeko udal langileek beharrezkoak dituzten baliabideak ematen jarraitzeko.
2.- Dei egiten diogu euskal klase politikoari horrelako oldarraldia ekidin dezakeen bidea eta akordio politikoa jorra dezan, horretarako legea egokituz, alegia, Euskararen Legea sendotuz. Egia da hizkuntza bat ez dela legez eta dekretuz normalizatzen, baina hizkuntzaren kontrako erasoak ekiditeko tresna izan behar dute legeek eta dekretuek, eta gaur artekoek dagoeneko ez dute horretarako balio.
3.- Dei egiten diogu euskal jendarteari oldarraldiari aurre egiteko, besteak beste, euskaraz bizitzeko hautua egin dezan, euskara nonahi harrotasunez erabiliz.
4.- Dei egiten diegu euskal langileei euskararen alde ager daitezen eta lan-mundua euskalduntzeko prozesuan indar erabakitzaileak izan daitezen.
5.- Dei egiten diegu herritarrei Euskalgintzaren Kontseiluak eta Bokale Pasaiako Euskararen Aholku Batzordeak deitu duten elkarretaratzean parte har dezaten: bihar, apirilaren 12an, 18:30ean Pasai Antxoko Biteri plazan.
EUSKAL LANGILEOK EZ DUGU EUSKARAREN AURKAKO EPAIRIK ONARTUKO!
