Euskal Sistema Finantzario Publikoaren aldeko
eta Euskal Kutxak-Kutxabanken pribatizazioaren kontrako plataforma
Euskal Autonomia Erkidegoko Aurrezki-Kutxa
eta Banku-Fundazioen Lege-aurreproiektuaren kritika
Plataforma osatzen dugun erakunde sozial eta sindikatuok berretsi egiten dugu euskal kutxak likidatu eta banku bat sortzea, zeinaren jabegoa akziodun pribatuen esku geratuko den, euskal jendarteari egindako iruzurra dela.
Salatu dugunez, prozesu hau babesten duten alderdi politikoek ez dute eman ezta arrazoi bakarra ere euskal ekonomiaren eta herritarren aldekoa izango litzatekeela justifikatzeko.
Alternatiba bideragarriak proposatu ditugu, baita ordezkatzen dugun gehiengo sozial eta sindikala aintzat har dezatela exijitu ere, gure herriari funtsezko tresna baten gaineko kontrol publiko eta soziala kendu baino lehenago. Funtsezkoa, diogu, enpresa txiki eta ertainei eta pertsonei kreditua errazteko. Hala izan ohi da beste herrialde europar batzutan.
Beti oztopo bera izan dugu aurrez-aurre: EAJ, PP eta PSEren erabakia. Hauen xedea banku handien eskariak betetzea baino ez da, eta Euskal Kutxen gordailupean dauden milaka milioi euro akziodun pribatuen esku jartzea.
EAJk, PPk eta PSEk zorrotz jarraitzen diote markatutako bide-orriari. Estatuko Kutxen legea erreformatu dute; Kutxak likidatu eta Fundazio bihurtu dituzte, eta hauteskundeak igarotzeko zain daude, desinbertsioari eta akzioen salmentari ekiteko.
Orain, Kutxak-Kutxabanken pribatizazioa are atzeraezinagoa izan dadin, Euskal Kutxen Legea aldatzeko prozesua hasi dute: horretarako aurkeztu dute Euskal Autonomia Erkidegoko Aurrezki-Kutxa eta Banku-Fundazioen Lege-aurreproiektua.
Behean sinatzen dugun erakunde sozial eta sindikatuok lege-aurreproiektua erretira dezatela eskatzen dugu, honako arrazoiengatik:
EAEren arau-eremuan Euskal Kutxen likidazio-egiaztagiria besterik ez da. Hauek banku-fundazio bihurtu dituzte, eta beren banku-negozioa Kutxabanki eskualdatu diote. Horrela, Lege honen eremutik kanpo geratu dira.
Ez gaude ados Legearen xedearekin. Lehen artikuluko lehen puntuaren ondorioz etorkizuneko euskal kutxak sortzeko eta garatzeko aukerak zeharo murrizten dira, 26/2013 Legean ezarritako mugak onartu egiten baitira.
Halaber, salatu egin behar dugu artikulu horren beraren 2. puntuan banku-fundazioen eredu antidemokratikoa betikotu egiten dela. Ez dira saiatu ere egin patronatu horiek Kutxentzat ezarritako osaera eta funzionamendu bera izan dezaten.
Aurreproiektu honek gaia aipatzen ez duenez, 15 lagunen esku uzten du fundazioko patronatuaren esku dauden Kutxabankeko akzioak noiz eta nola saldu. Hauxe da kapital pribatuak akzioak eros ditzan eskuak libre uzteko modurik onena.
Aurreproiektu hau, guk ordezkatzan dugun gehiengo sozial eta sindikalarekin inolako kontraste, negoziazio eta adostasunik gabe egin du gobernuak, eta honi buruz plazaratu izan ditugun alternatibak baztertu egiten ditu.
Gobernu-organoak osatzeko proposatu diren aldaketei gehiegi erreparatu gabe ere, erabat gaitzesten dugu aginte mailan herri-erakundeek duten presentzia-galera, eta bezeroei dagozkien lekuen %50 “ezarle handientzako” gorde nahi izatea.
Hau ez da euskal ekonomiak, ez enpresa txiki eta ertainek, ezta pertsonek behar duten Legea. Aitzitik, testuak estaldura formala ematen dio herritarren baliabideetan egin den espoliazio bati, betiere akziodun pribatuen mesederako.
Berriro diogu, gaur premiazkoa eta ezinbestekoak dira honakoak:
• Banku-fundazioen esku dauden Kutxabankeko akzioak herri-erakunde sortzaileei itzultzea.
• Fundazioak, administrazio-kontseilua eta Kutxabankeko akziodunen batzarra kudeatzeko, kudeaketa-marko demokratikoa artikulatzea.
• Benetako Kutxen Legea egitea, haien izaera publiko eta soziala hobetzeko, muga bakarra euskal herritar eta erakundeen erabakiak izango direlarik.
• Euskal finantza-sistema publiko bat eraikitzeko beharrezko diren ekimen politiko eta instituzionalak erabakitzea, euskal enpresa txiki eta ertainen eta pertsonen beharrizanak asetzeko aukera emango duena.
• Honako aurreproiektua berretsi eta antzeko erabakiak hartu aurretik herritarrei kontsulta egitea, balizko alternatiba guztiak aztertzea eta erakunde sozial zein sindikatuen iritzia aintzat hartzea.
Gasteiz, 2015eko urriaren 27an
Eragile sozialak: AHT Gelditu Elkarlana –Berri-Otxoak – Bilboko Auzo-Elkarteen Federazioa – Denok lan – Euskal Herriko Pentsionisten Plataformak – Ezker Gogoa – IRPH Stop – Kontsumitzaile Elkarteak (EKE, UCE, EKA, EHKB, OCUV) – Kutxabank publikoa bilgunea – M15 – REAS (Red de Economía Alternativa y Solidaria) – PAH Kaleratzerik ez! – STOP desahucios Gasteiz – STOP deshaucios Gipuzkoa.
Sindikatuak: EHNE – HIRU – ELA – LAB – ESK – STEILAS – CNT