Milaka lagun elkartu gara gaur Donostian, astelehenean izandako operazio politiko-polizialari erantzunez, giza eskubideen, bakearen eta konponbidearen alde eragile sozial, politiko eta sindikalon deialdiari jarraituz.
ARGAZKI GALERIA
Bada garaia herri hau Espainiako estatuak kondenatu nahi duen zurrunbilotik ateratzeko; tunelaren iluna atzean utzi eta gatazkaren konponbidea argiztatzeko. Ez du denak balio, eta hori esatera irten gara kalera, alegia, ez gaudela prest gure etorkizuna Espainiako Gobernuko agintari arduragabeen eskuetan uzteko.
Euskal herritarrok gure bidea egin nahi dugu eta bidea egiten segiko dugu, erasoen tamainako elkartasun erakustaldiekin, presoen eskubideen defentsan eta gatazkaren konponbidean konpromiso berriak hartuz.
Ahotsa.info
Eragile sozial, politiko eta sindikalen irakurketa asteleheneko operaziaren harira
GIZA ESKUBIDEAK, BAKEA ETA KONPONBIDEA
«Besteak beste, euskal presoen defentsa eta ordezkaritza legala egiten duten abokatuak eta beste herritar batzuk atxilotzea ekarri zuen egindako polizia operazioak denboran atzera begira jarri gintuen atzo, Euskal Herrian bizi izan ditugun azken urteak debaldekoak izango balira bezala. Atzoko sarekada soberan zegoen, atxilotutako pertsonak errez aurkitzeko modukoak direlako, operazioa agindu duen epailearen disposizioan jarri zirelako eta bere lana Audientzia Nazionalean, espetxeetan eta ezagupen publikoko bulegoetan egiten dutelako.
Elementu eta ezaugarri zehatzak erraz atzeman daitezke polizia operazio honen atzean. Izaera erabat politikoa daukan polizia operazioa da, eta sarekadaren benetako helburuak ez daukala zerikusirik Espainiako gobernuak esaten eta baieztatzen duenarekin.
Atxilotutako pertsonei eragiten dieten ondorio zuzenez gainera, era honetako ekinbideek behin eta berriro atzeratu dute herritar guztiei dagozkien oinarrizko eskubideak eta bermeak errespetatuak eta beteak izatea; egiazko demokrazia batean, eskubide eta berme horiek beste edozein interesen gainetik eta aurretik egon beharko lirateke.
Gero eta hedapen handiagoa duten eremu politikoak, juridikoak eta sozialak Espainiako Gobernuak indarrean daukan espetxe politika zalantzan jartzen duten unean iritsi dira atxiloketak. Elkartasun keinuak areagotzen doazen heinean, Estatuak kriminalizatu eta lapurtu ditu eta elkartasuna delitu bilakatu. PPren gobernuak euskal presoei ezartzen dien sakabanaketa politikaren ondorioz indarrean jartzen dituen salbuespen neurriak gero eta zilegitasun gutxiago dute gizartean.
Espetxe politikaren aurka larunbatean eginiko mobilizazio erraldoiaren ostean gauzatu dira atxiloketa hauek. Gaur bertan, Espainiako Auzitegi Gorenak Frantziako estatuko espetxetan zigorra bete duten presoen zigorra luzatzeaz erabaki behar du eta, atzo ere, ezker abertzaleko 35 kideren aurkako epaiketa zen abiatzekoa Audientzia Nazionalean, baina abokatuen atxiloketaren ostean atzeratu egin den epaiketa.
Atxiloketa hauek eraso zuzena dira bake, askatasun eta demokrazia egoera bat sortzeko egiten ari diren ahaleginei eta egoera sozial eta politiko berriari.
Egoera berri horren aurka egitearekin tematua dagoen estatua dugu aurrez aurre. Espainiako Gobernuak giza eskubideak zein eskubide zibil eta politikoak urratzen dituzten politikak garatzen ditu, gatazkari zein bere ondorioen konponbideri lagundu beharrean.
Bada garaia herri hau Espainiako estatuak kondenatu nahi duen zurrunbilotik ateratzeko; etorkizunari begiratzeko unea da, askatasunean, bakean eta demokrazian oinarrituko den etorkizuna eraikitzeko konpromisoak hartzekoa. Ez du denak balio. Ez gaude prest gure etorkizuna Espainiako Gobernuko agintari arduragabeen eskuetan uzteko. Euskal herritarrok bakean, demokrazian eta askatasunean bizi nahi dugula erabaki dugu. Atera gaitezen zurrunbilotik.
04/08 EPAIKETAREN KIDEOK • ABOKATUAK • AHT ELKARLANA • ALTERNATIBA • ARALAR • BILGUNE FEMINISTA • CGT-LKN EUSKAL HERRIA • CNT • EA • EGIARI ZOR • EHE • EHNE • ELA • ERAIKI ARALAR • ERNAI • ESAIT • ESK • STEILAS • ETXERAT • EZKER GOGOA • GAZTE ABERTZALEAK • GITE-IPES • GOLDATU • HIRU • IKASLE ABERTZALEAK • LAB • LOKARRI • SORTU
GIZA ESKUBIDEAK, BAKEA ETA KONPONBIDEA»