Corrugados Azpeitiako Enpresa Komitea atzo Gallardo taldearekin bildu zen Madrilen enpresak iragarritako kaleratze eta soldata jaitsierak negoziatzeko. Komitea Enpresaren etorkizuna argitu eta bideragarritasuna bermatuko duen plan bat aldarrikatuz zuzendu zaio Gallardo Taldeari eta enpresak proposamen bakar bat ere egin ez du mahai gainean jarri.
Corrugados Azpeitiako Enpresa Batzordearen irakurketa
Enpresaren etorkizuna argitu eta bideragarritasuna bermatuko duen plan bat aldarrikatuz zuzendu gatzaizkio Gallardo Taldeari, orain arte egin dugun moduan, mobilizazioetan, greba mugagabearekin… aldarrikatu dugunari eutsiz.
Gallardo taldeko zuzendaritzaren eskutik jaso dugun erantzuna guztiz onartezina eta larria da:
Proposatutako 60 kaleratzeei eutsi egiten die. Aldaketa bakarra onartuko luke, kaleratzeko izendatutako langileetatik 15 berronartzea baina horien tokian beste 15 lagun kaleratzea. Kaleratze‐berronartze erabakietarako enpresa batzordearen oniritzia izatea bilatu dute, hau da, enpresa batzordea erabaki horietan parte izatea bilatzen dute.
Soldata murrizketei ere eutsi egiten die. Proposatu duten aldaketa bakarra, soldata baxuenak dituztenei %30eko jeitsiera ezartzea eta altuagoak dituztenei %40a, baina beti ere, bere helburuak beteko direla bermatuz.
Ezarritako baldintza onartezin horiek negoziatzekotan, hemendik eta urte amaiera bitarte aplikatu asmo duten 66 eguneko suspentsio EEEaz eta lanordu igoeraz hitz egitea mahai gainean jartzearekin batera mehatxu egin dute, egoera aldatu ezean hurrengo bi hilabetean kaleratze gehiago eman daitekeela.
Gaurko bilera Gallardo taldearen aldetik antzerki hutsa izan da. Enpresaren bideragarritasunari begirako proposamenak zeuzkatela saldu nahi izan dute, proposamen bakar bat ere egin ez dutenean. Corrugados Azpeitiaren etorkizuna ziurtatu eta lantegiaren bideragarritasun bermatuko duten neurri bakar bat ere ez digute aurkeztu.
Jarrera hori salatzearekin batera, enpresa batzordetik argi eta garbi adierazten dugu geure aldarrikapenei tinko eusten diegula: ez dugu kaleratze traumatikorik onartuko; enpresaren etorkizuna argitzea eskatzen dugu, eta bideragarritasun plan bat aldarrikatzen dugu, gure lantegiaren eta lanpostuen etorkizuna bermatuko duena.»