Vicinay Taldearen parte den Cables y Alambres Especiales enpresako zuzendaritzak 43 langileentzako Iraungitze Enplegu Erregulazio Espediente baten negoziazioa jarri zuen abian joan den abuztuaren 1ean. 122 langilek osatzen dute, egun, plantilla. Bada, hiru bileren ostean, enpresak aldebakarrez erabaki du 35 langile kaleratzea.
Iraungitze Enplegu Erregulazio Espediente honen aurrean, Cables y Alambres Especiales enpresako LAB eta ELA sindikatuek erabaki honen aurkako salaketa egin nahi dute arrazoi hauengatik:
1-Enplegu Erregulazio Espediente honekin lanpostuak suntsitu nahi dituzte, eta Enplegu Erregulazio Espediente horretatik kanpo geratzen direnen lan baldintzak murriztu neurri handi batean eta industria proiektua eta etorkizuneko enplegua arriskuan jarri. Oraindik ez dakigu nola nahi duten Cables y Alambres berpiztu, enpresak ez baitu inolako industria planik aurkeztu, adierazpen hutsalak besterik ez baititu egin, bermatuta ez dagoen behin behineko finantzazio bati lotutakoak. 35 langile gutxiagorekin ezinezkoa da ekoizpena bermatu.
2-LAB eta ELA sindikatuok alternatibak eskaini dizkiogu enpresari, 35 langile kaleratzetik oso urrun daudenak; borondatezko eta sustatutako irteerak, taldearen enpresetan birkokatzeak eta aurrejubilazioak. Era berean, gainontzeko langileentzat bermeak eskatzen ditugu enplegu, lan baldintza eta beharrezko inbertsioen gauzatzearekin lotuta. Egingarriak diren proposamenak dira. Irtenbideak horren kaltegarriak ez izateko proposatutako aukerei ezetza eman die enpresak, eta, aldi berean, langileen batzordearen irizpide bateratua hausten saiatu da, Vicinay Taldearentzako berregituraketa erraz eta merkea lortzeko helburuarekin.
3-LAB eta ELA sindikatuok ez dugu berritasunik ikusten enpresak egindako proposamenean. Enplegua eta lan baldintzekiko konpromiso ezak ezkutatzen du sasi industria planaren izaera zalantzagarria. Izan ere, benetako finantzazioa lortu nahi da enpleguaren egungo eta etorkizuneko bolumenaren eta lan baldintzen murrizketarekin. Txeke sozial zuri batek ezin du ordezkatu Cables y Alambres enpresaren aldeko apustua egiteko benetako borondatea.
4-Erandion dago Cables y Alambres enpresa, ibaiaren aurrean. Udalerriak bizitoki gune gisa izendatutako lurretan dago. Hain zuzen ere, etxeak egiteko etorkizuneko birkalifikatze bat dago aukeran lur horietarako.
5-Vicinay taldea 2015. urtean sartu zen Cables y Alambres enpresan, enpresaren aurreko akziodunekin, Eusko Jaurlaritzarekin eta Bizkaiko Foru Aldundiarekin akordio batera iritsi eta gero. Azken hauek lantegia dagoen lurren jabe zen, SOCADE elkartearen bitartez. Lur hauen erosketa Euskal Finantza Institutuak finantzatuta erdietsi zuen, Vicinay Taldeari kreditu bat eman ostean. Lur horiek behin betiko erosteko erakundeekin lortutako akordio horren baldintza zen Vicinay Taldeak 2020. urtea arte jarduera mantendu behar zuela. Hala ere, joan den abenduan saldu zizkioten lurrak, behin betiko, Vicinay Taldeari, eta honek higiezinen elkarte bat sortu zuen lurrak eskuratzeko, Cables y Alambres enpresak jabetza galduz.
6-Orain, enpresak langileen batzordeari akordio bat exijitzen dio kaleratzeak gauzatzeko, inolako bermerik eskaini gabe eta etorkizunera begira inolako konpromisorik hartu gabe, ardurak hartzeko inolako asmorik duen Vicinay Taldea tartean dela. Gauzak horrela, txeke zuri bat exijitzen du eta proposatzen duen alternatiba bakarra enpresa likidatzea da, Enplegu Erregulazio Espedientearen bidez akordioa lortu ezean. Horrela, edonork kudeatu dezake edozein enpresa. Vicinay Taldearen politika izan da, Eusko Jaurlaritzaren eta Aldundiaren laguntzarekin, kreditu baten arabera finantzatutako proiektu bat aurrera eramatea berme bakar batekin: lan kostuen murrizketa egitea.
7-LAB eta ELA sindikatuok iritzi dugu Cables y Alambres enpresaren bideragarritasuna ez dela kaleratzeekin bermatzen, bideragarritasun plan baten bitartez baizik, makinen zein instalazioen egoerak segurtasuna eta ekoizpena bermatzen ez duten lantegian beharrezkoak diren inbertsioak jasota.
8-Benetako plan bat exijitzen dugu higiezinen espekulazioaren mamua urruntzeko eta bideragarritasun ekonomikoa eta etorkizuna duen industria proiektu bat sortzeko.
Honentzako, lantegia udalerriko beste kokapen batera lekuz aldatzeko helburuarekin lurren birkalifikazioa eta ondorengo salmenta beharrezkoa bada, alde sozialetik prest gaude birmoldaketa prozesu bati ekiteko, beti ere enpleguarekiko eta lan baldintzekiko errespetagarria izanez gero.
Egoera honen aurrean, Eusko Jaurlaritzari zein Bizkaiko Foru Aldundiari eskatzen diegu dagokien ardura hartu eta borondate eta ekimen politikoa erakuts dezatela, gure herriko industria sarearen aldeko apustu erreal baten alde.