Kutxabank pribatizatzearen aurkako Plataformaren ustez, estres testak gainditzea ez da inolako bermea frogatzeko bankuen benetako kaudimena, beren aktiboen benetako balioa, eta askoz gutxiago ikusteko ea benetan betetzen dituzten beste eginkizun batzuk, esaterako zerbitzu publiko izatea, sare produktiboarekiko inplikazioa eta aberastasunaren bidezko banaketarako tresna izatea.
Estres testak gainditzeak ez du esan nahi finantza-erakundeek bete beharko luketen eginkizun soziala betetzen denik
«Estres testak gainditzeak ez du esan nahi finantza-sistemak bere eginkizun soziala betetzen duenik. Oraingo test hau bankuek eta Europako Banku Zentralak Oliver Wyman aholkularitzarekin egin dute, bankuen esku hamarna milaka milioi euro jarri eta gero, akziodunen interesak bermatzeko.
Mario Fernandez Kutxabankeko presidentearen esanetan, nota ona lortzeko eragiketak egin ondoren akzioak saldu behar dira eta akziodunen irabazi aukerak hobetu.
Kutxabank pribatizatzearen aurkako Plataformaren ustez, estres testak gainditzea ez da inolako bermea frogatzeko bankuen benetako kaudimena, beren aktiboen benetako balioa, eta askoz gutxiago ikusteko ea benetan betetzen dituzten beste eginkizun batzuk, esaterako zerbitzu publiko izatea, sare produktiboarekiko inplikazioa eta aberastasunaren bidezko banaketarako tresna izatea. Krisian kiebra jo zuten erakundeek ere, zeinak orain eta etorkizunean diru publikoz sostengatuak izango diren (Bankia, Catalunya Caixa, Irlandakoak, etab.), gainditu zituzten aurreko test eta kontrolak. Bestalde, proba hauetatik onik ateratzeak ez du esan nahi finantza-erakundeek kreditua emango dutenik, hots, beren benetako funtzioa beteko dutenik.
Test hauek irizpide berriekin egin dira, eta hauek ikuspuntu sozialetik zalantzan jartzekoak dira, izan ere, finantza-erakundeek sare produktiboarekiko duten konpromisoa zigortu egiten baitzuten; ondorioz, nota hobea ateratzeko finantza-erakundek empresa estrategikoetan zituzten akzio-pakete handiak saldu dituzte. Esaterako, Kutxabankek enpresa industrialetako bere aktiboak murriztu egin ditu, eta 340 milioi euroko balioa zuten hainbat kontratu putre-funtsei saldu die (horren truke 5 milioi euro besterik ez duelarik jaso, bitartekarien komisioak kendu eta gero). Etekinak lortzeak estres testeko emaitza hobetzen du, horretarako komisioak igo, etxe-gabetzeak agindu, gizarte-ekintza murriztu edota lanpostuak kendu nahiz langileen soldatak jaitsi behar badira ere; haatik, horrek ez du inola ere esan nahi finantza-erakundeek bete beharko luketen eginkizun soziala betetzen denik.
Gure Plataformak ohartarazi nahi du Kutxabankek beste finantza-erakunde batzuk erosi balitu, zuzendaritzaren eta pribatizazioa babestu duten alderdien nahiari jarraiki, estres testean askoz nota txarragoa aterako zukeela.
Estres testak, bere logikaren arabera, frogatzen du Kutxabankeko akzioak saldu beharrik ez dagoela. Bere akziodunen artean kapital pribaturik ez sartzeko konpromisoa hartu beharko litzateke, eta akzioen %100 kapital pribatuarengandik aparte mantendu. Gogoratu beharrekoa da egungo Kutxen Legeak akzioen %100 banku-fundazioen esku mantentzeko aukera ematen duela, baldintza jakin batzuk betez gero, besteak beste, kaudimena bermatzeko funts bat sortzea. Halako funts bat sortzeko zenbat diru beharko litzatekeen ez dute inoiz zehaztu, baina argudiotzat erabili izan du Kutxabankeko zuzendaritzak etorkizunean kapital pribatuaren sarrera justifikatzeko. Estres testen datuek diotenez, ordea, funts hori oso txikia izan beharko litzateke, eta ondorioz, Kutxabankek ukatu egin beharko luke bere akziodunen artean kapital pribatua sartzea. »