LABek elkarretaratzeak burutuko ditu bihar, uztailak 26, Iruñean 12tan udaletxearen aurrean eta ostiralean, uztailak 27, Gasteizen goizeko 11etan Gobernuaren Ordezkariordetzaren aurrean AENAn izango diren pribatizazio, murrizketa eta kaleratzeak salatzeko.
Aire sektorearen pribatizazioak aurrera jarraitzen du. Espainiako gobernuak aireportuetako ordutegiak eta langile kopurua murriztu nahi ditu, Gasteizen adibidez aireportuaren ordutegia erdira pasako litzateke eta langile kopurua 140 izatetik 18ra (%87ko murrizketa).
LABek jendartearen zerbitzura egongo den euskal sektore publiko sendo baten beharra aldarrikatzen du eta horretarako beharrezko ikusten du euskal aireportuen kudeaketa Hego Euskal Herriko administrazio publikoetara pasatzea.