2024-08-31
HomeLan Osasuna IdazkaritzaPrekarietatea Hiltzailea"Langileok ezin ditugu babestu lan hildakoak saihesteko konpromisorik jasotzen ez dituzten aukera...

“Langileok ezin ditugu babestu lan hildakoak saihesteko konpromisorik jasotzen ez dituzten aukera politikoak”

LABeko idazkari nagusi Garbiñe Aranburuk eta Ekintza Sindikaleko idazkari Xabier Ugartemendiak Greba Orokorraren ondorengo testuinguru politiko eta sozioekonomikoa aztergai izan dute Bilbon. Bizitza duinaren alde, prekarietatearen kontrako borrokak ardatz hartuta iritsi ginen grebara. Urtarrilaren 30az geroztik, baina, langileon bizi eta lan baldintzek okertzen jarraitzen dute. Urtea hasi zenetik 12 langile hil egin dira eta 2 pertsona desagertuta daude une honetan. "Langileok kaleak bete ditugu dagoeneko, mezu argi bat luzatu dugu Greba Orokorrarekin, eta orain hautestontzietan luzatu behar dugu mezu hori", adierazi du Garbiñe Aranburuk, apirilaren 5ean hauteskundeak izango direla iragarri berritan.

"Azken Greba Orokorretik hamaika egun besterik ez dira igaro eta gaur arrazoi gehiago ditugu, indar eta konbentzimendu gehiago, lan, pentsio eta bizitza duinen alde lan egiten jarraitzeko".

Garbiñe Aranbururen hitzak dira hauek, Bilbon egindako agerraldian esandakoak. Arrazoi berriak ditugula adierazi du, greba egunetik beste bi langile hil egin direlako eta, momentu honetan, bi langile daudelako desagertuta. Hala, hauen senide eta lagunei elkartasuna adierazi die.

LABeko idazkari nagusiaren hitzetan, "azken egunotan agerian geratu da kapitala eta bizitzaren arteko talka. XXI mendean, Euskal Herrian lanera joateak gure bizitza arriskuan jartzea dakar. Ez dugu egoera hauek naturalizatzen uzten utziko, patronalaren indarkeria forma bat baita langileekiko. Lan istripuak saihestu daitezke, saihestu behar dira".

Garbiñe Aranburuk kritikatu du, urtarrilaren 30a historikoa izan arren, Iñigo Urkullu lehendakariarentzat egun huts bat izan zela; eta Zaldibarreko afera gauza bera dela harentzat, beste egun bat besterik ez: "Lehendakari honek, aukera duen bakoitzean, patronalari babesa erakusten dio; langileekin egoteko, berriz, ez du inoiz aukera ikusten".

Lau egun agertu gabe egon eta gero, lehendakaria atzo isiltasunetik irten zela azaldu du, "baina ez desagertutako langileen familiei elkartasuna adierazteko, ezta ardura politikoak argitzeko ere. Bi langile lur azpian daude eta bizitzak aurrera darrai, eta lehendakariaren kezka bakarra hauteskundeak dira. Hau oso larria da".

Eusko Jaurlaritzak ezin dio bere erantzukizunari uko egin, Zaldibarreko zabortegia kudeatzen duen enpresa pribatua dela esaten: "Gertatzen ari den guztia eskandalagarria da. Berriro ere, langileen osasuna eta bizilagunen osasun publikoa ez da erdigunean egon. Berriro ere, beste interes batzuek izan dute lehentasuna. Ekonomia egon da pertsonen aurretik".

Hutsune asko daudela azpimarratu du Garbiñe Aranburuk, eta euskal gehiengo sindikala halako egoeren aurrean etengabe mobilizatzen ari dela adierazi du: "Eta proposamenak ditugu. Grebaren harira, patronala eta instituzioak interpelatu ditugu. Orain EAEko hauteskundeak iragarrita daudela, LABetik uste dugu interpelazio horiek indartu behar direla".

Garbiñe Aranbururen hitzetan, "unea da gure aldarrikapenak agenda politikoan kokatzeko. Alderdi politikoei exijitzen diegu euren programa politikoetan grebara eraman ziguten aldarriak integra ditzaten".

LABeko idazkari nagusiaren esanetan, "langileok kaleak bete ditugu dagoeneko, mezu argi bat luzatu dugu Greba Orokorrarekin, eta orain hautestontzietan luzatu behar dugu mezu hori. Erantzukizunez erantzun behar dugu. Langileok ezin ditugu babestu lan hildakoak saihesteko konpromisorik jasotzen ez dituzten alderdi politikoak, lan, pentsio eta bizitza duinak bermatzeko konpromiso argirik ez dituzten alderdiak. Izan ere, borondate politiko kontua da pertsonen beharrak lehenestea eta beste eredu ekonomiko eta sozialerako bidea egitea, justizia soziala eta lanaren eta aberastasunaren banaketa justua oinarri".

 

 

 

AZKEN ALBISTEAK | ĂšLTIMAS NOTICIAS

Cementos Rezolako Langileen Asanbladak enpresaren azken proposamena onartu du

Gaur Cementos Rezola enpresako Langileen Asanblada Orokorra egin dute, enpresak astelehenean egin zuen proposamena baloratu eta honen inguruan bozkatzeko. Hau horrela, eta enpresak iragarritako kaleratzeak bihartik aurrera efektibo egiten hasiko dela jakinda, enpresa batzordeak erabakia Asanblada Orokorrera eramatea erabaki zuen.

%100eko jarraipena izan du Amezketako Aralar paper lantegian izandako laneko heriotzaren aurreko lanuzteak

Lanuztearen jarraipena erabatekoa izan da eta gelditu egin da lantegiaren jarduera. Azpikontratatuako langileek ere parte hartu dute. 11:00etan, mobilizazioa egin dute Amezketako lantegiaren atarian, “Lan heriotzarik ez. Langileen segurtasuna bermatu” lemapean.

Lan istripuen kontrako protokolo intersindikala aurkeztu dugu Ipar Euskal Herrirako

LAB, CGT, FSU eta Solidaires sindikatuok Ipar Euskal Herrian lan istripuei aurre egiteko lehen protokoloa publiko egin dugu, Donibane Lohitzunen egindako agerraldian.