LABeko liberatu eta ordezkariei zuzendutako Topaketa Sindikalak egin genituen gaur Arrasaten, sindikatuko 200 liberatu eta delegaturen parte-hartzearekin. Honela, 2022an Baionan eta Miarritzen egin genuen 10. Biltzar Nagusiko erabaki berritzaileenak prestakuntzatik aberasteko bildu gara aurten ere.
Ipar Hegoako arduradun Jagoba Zuluetaren aurkezpenaren ondotik, Garbiñe Aranburu koordinatzaile orokorraren hitzartzeak eman zien hasiera topaketei, eta hark kontrabotere sindikalismoaren klabeetan laburbildu du aurten 50 urte bete dituen LABen historia. Langileen aldeko neurriak lantokietan, kalean eta instituzioetan ere borrokatu behar direla nabarmendu zuen, eta sindikatuaren lorpenen artean, honakoa adierazi zuen: “Euskal Herrian dagoen dinamika sindikal eta sozial aberatsa ez du LABek bakarrik eragin noski, baina ezin da ulertu LABen ekarpen garrantzitsurik gabe eta honek ere eragiten du Ezker Independentismoaren indartzea”.
“Botere sindikalaren azterketa” izan zen goizeko lehen blokearen izenburua. Hemen, Julen Aperribairen galderei erantzun zieten Edurne Larrañaga Ipar Hegoa Fundazioko Azterketa arduradunak eta Asier Etxenike, Aztiker Soziologia Ikerguneko Ikerketa saileko berrikuntza arduradunak.
Jendarte, lan merkatu, lan-harreman eta botere sindikalaren azterketa ardatz hartuta, hainbat gairen inguruko datuak eman zituzten; hala nola, Hego Euskal Herriko biztanleriaren ezaugarriak eta bilakaera demografikoa, biztanleriaren ezaugarriak lan merkatuarekiko, enpresa demografia, lan gatazkak eta akordioak, hauteskunde sindikalak eta afiliazioa.
Edurne Larrañagak, datuetan oinarrituta, nabarmendu du borrokak beti merezi duela, gatazken areagotzeak hitzarmenen estaldura lortzen duten langileen kopurua igotzen duelako.
Atsedenaldiaren ondoren etorri zen goizeko bigarren blokea, “Sindikalizazio estrategia”, Izaskun Garcia Antolaketa arduraduna eta Oihana Lopetegi Ekintza Sindikaleko arduradunaren hitzartzeekin.
Bi hankako kontrabotere eredua
Garciak zehaztu zuen LABen kontrabotere ereduak buru bat duela (ekintza sindikala) eta bi hanka: lehenik, ekintza soziosindikala; hau da, langileon lan eta bizi balintza duinen alde borrokatzea; eta, bigarrenik, sindikalizazio estrategia, hau da, langileak ahaldundu, politizatu eta antolatzea.
Kontrabotere sindikalismoa eguneratzeko gogoeta ere aipatu zuen Garciak, 2015ean LABek martxan jarritako sindikalismoa birpentsatzeko prozesua eta honen inguruko praktika etengabea aipatuz.
Klase subjektua berrosatzeko helburuaren baitan, langileriaren definizioa eta iruditegia zabaltzearen garrantzia ere aipatu zuen, LABek langile sektore guztien etxea izateko bokazioa baitu. Honekin lotuta Mariana Urcuyo Etxeko langileen atal sindikalaren arduradunaren lekukotza entzun ahal izan genuen.
Oihana Lopetegik, bere aldetik, aipatu zuen borroka eskaintza zabaldu duela LABek, eremu bakoitzaren ezaugarrietara egokituz eta horrela, eremu sindikalizatuak eta sindikalizatu gabeak erantzun. Honekin lotuta, Fernando Ortega Trapagarango Amazoneko delegatuak bere esperientziaren berri eman zuen.
Ondoren, langile borroka herriratzeko era berriak aipatu zituen Garciak, lan borroketan ere herri mugimenduekin elkarlana eta borrokak herritarrekin konektatzeko saiakeretan sakonduz. Honekin lotuta, Ixone Retes Tubacexeko delegatuek Aiaraldeko enpresan egin zuten borroka luzearen berri eman zuen.
Jarraian, Lopetegik hartu zuen berriro hitza, ekintza sindikala eta hedapena uztartzea elkar elikatzen duten eta osagarritzen diren eginkizunak direla zehaztuz. Horrela, oinarria zabaltzearen beharra aipatu zuen, borroketan eraginkortasuna irabazi eta lorpenak eskuratzeko eta bestetik borroketan gauzatutako ahalduntze prozesuak organizatiboki kontsolidatzeko. Honekin lotuta, hiru esperientziaren berri izan genuen: EAEko gizarte ekimeneko ikastetxeak (Eneko Garmendiaren eskutik), Gipuzkoako kiroldegiak (Ainara Etxabideren eskutik) eta Nafarroako esku hartze soziala (Joseba Pagolaren eskutik).
Bere azken hitzartzean, enplegu duinaren borroka bizi baldintza duinen borrokarekin uztartu beharra aipatu du Izaskun Garciak, eta, horrekin lotuta, Ekintza Sozialeko Jaimek Iribarrenek Iruñerriko etxebizitza asanbladaren esperientziren berri eman du eta Eñaut Aramendik, Ipar Euskal Herrian etxebizitzaren inguruan egindako lanaz informatu du.
Arratsaldean, 6 tailer izan ziren gogoeta eta prestakuntza espazio bezala, LABek irekita dituen lan ildo ezberdinetaz aritzeko.
Talde argazki batekin eman genien amaiera topaketei, eta Munduko Sindikatuen Federazioaren urtemugaren bueltan, elkartasun internazionalista ardatz hartuta, Palestinaren aldeko irakurketa bat egin genuen.
