Lan eta bizi baldintza duinen aldeko neurriak aldarrikatu, eta horien gainean Euskal Herrian bertan erabakitzearen aldeko aldarria erdigunean jarriko du LABek aurtengo ikasturtean, pasa den astean iragarri zuenez. Langileen aldeko politikak behartzeko konfrontazioa beharrezkoa izango dela iritzita, lantoki eta sektore mailako borroketan parte hartzen jarraitu, eta, era berean, gobernuak eta patronala interpelatuko ditu LABek; nagusiki, hiru aldarrikapenekin: 1.600 euroko gutxieneko soldata ezar dadila, negoziazio kolektibo intersektorialaren bidez; lanaldia 30 ordura jaitsi dadila, digitalizazioak ekarriko duen enplegu suntsiketari erantzuteko, krisi ekosozialak eskatzen duen trantsizioari ekiteko, eta zaintza krisiari aterabidea emateko; eta zerbitzu publikoak indartu ditzatela. Halaber, neurrion gaineko erabakiak Euskal Herrian bertan hartzearen premia ere mahaigaineratu nahi du kanpainak.
Kanpaina Hego Euskal Herriko eskualde guztietara eramateko anbizioa du LABek, eta, asmo horrekin, gaur hasi eta urriaren 11ra bitarte ehunka ordezkari sindikal bilduko ditu hamalau batzarretan. Horietan, eskualde bakoitzean ikasturteko erronkak zein diren xehatu, eta, aldi berean, kanpainak ezarritako helburuak eguneroko jardun sindikalera nola eraman aztertuko dute.
Gaur egin dituzte lehen batzarrak Debaldean, Urola Kostan eta Bilbon. Bihar beste hainbeste egingo dute Donostian, Hego Uribe-Arratian eta Eskumaldean, eta datorren ostiralean Oarso-Bidasoako ordezkariak elkartuko dira. Urriaren 9an (Buruntza-Goierri, Gasteiz-Lautada-Errioxa, Aiaraldea, Ezkerraldea), 10ean (Nafarroa) eta 11n (Durangaldea, Busturia-Lea Artibai) izango dira hurrengoak.
