Igande honetan, martxoak 11, Fukushiman izandako istripi nuklearretik urtebete igaroko da, historian izandako bigarren jario radioaktiboa izan zen, Chernobilen 1986ko apirilak 26an izandakoaren ondoren. Isuri honen ondorioak, oraindik ere ezezagunak zaizkigu, orain arte inoiz ez delako itsasoko halako kutsadura mailarik izan. Aurrean dugunak, bertan behera uzten du zentral nuklearren teknologiak eta segurtasun sistemak hutsik ezin dutela egin dioen teoria.
Japoiko Fukushimako zentral nuklear honek, Garoñako Santa Maria zentralaren adin eta teknologia berberak zeuzkan. Arabako mugatik hain hurbil dagoen 42 urteko zentral zaharkitu hori lehenbailehen itxi beharra dago, besteak beste, emititzen duen erradiaktibitatearen pilaketa zeharo arriskutsua delako osasunerako, inguruan urdail eta biriketako minbizia kasuak ohi baino ugariagoak direlako. Baina batez ere, ez dugu ahaztu behar energia nuklearra oso arriskutsua dela. Garoñak dituen korrosio arazo, ezusteko eta geldialdiek ez dute ezer onik adierazten, gobernu popularraren industria ministroak, Soria jaunak, oso zalantzatan jartzen dugun CSNren txostenari kasu eginda Garoñaren bizitza 2019rarte luzatu nahi du, Mariano Rajoi Espainiar Estatuko presidenteari exijitzen diogu utz diezaiola erruleta errusiarrean jokatzeari eta behingoz itxi dezala.
Euskal Herriko jendarteak argi dauka energia nuklearra baztertu beharra dagoela eta ez dela erregai fosilen alternatiba. Horri esker ez zen eraiki Lemoiz, ez da ausartzen inongo Alkaterik hondakin erradioaktiboentzako biltegia Euskal Herrira ekartzen eta aldarri hedatua da Garoña ixteko garaia dela.
LABen apostua energia nuklearra baztertzea, eta energia aurrezteari eta eraginkortasunari benetako bultzada ematea da, energia berriztagarri garbiak eta instalazio sakabanatuak sustatzeaz gain. Ildo horretan, herri industrialdunok aurrerapausu handiak eman ditzakegu energia aurrezteko, batez ere elektrizitateari dagokionez.
Helburuak argi izanda, sistema energetiko seguruagoa lortu ahal izango dugu Euskal Herriaren beharrak asetzeko, lanpostu ugari sortuko duena, garapen ekonomiko orekatuagoa, aire garbiagoa eta osasun publiko hobea. Lehen urratsa, energia nuklearra baztertzea. Horregatik deitzen ditugu langileak eta orohar bizkaitarrak martxoak 10an FUKUSHIMA GEHIAGORIK EZ, GAROÑA ITXI ORAIN lemapean burutuko den manifestaziora, berau arratsaldeko 17:30ean Jesusen Bihotza plazatik irtengo da eta hainbat eragile politiko, sindikal eta sozialek deitzen dugu.