Gaur goizean LABeko ordezkariok Hernanin izan gara, azaroaren 30erako deitutako Greba Feminista Orokorrerako Herri Akordioaren aurkezpenean. Gure sindikatuak zaintza sistema publiko komunitarioa aldarri izanik, ezinbesteko hitzordua da datorren hilabete bukaeran nahiz ordutik aurrera datorkiguna, eta herriz herri eta auzoz auzo burubelarri dihardugu prestaketa lanetan, mugimendu feministarekin eta grebara batutako gainerako eragileekin batera.
Euskal Herriko hainbat mugimendu, sektore eta eragile ezberdinetako hamarnaka kidek aurkezturiko Herri Akordioaren bidez, zaintza sistema publiko-komunitario berri baten beharra plazaratu eta egungo zaintza erregimen sostengaitzaren irakurketa konpartitu bat egin nahi da.
Zaintza, bizimodu duina eraikitzeko oinarria da: ez da unean uneko zerbait, zaintza bizitzako une eta eremu guztietan beharrezkoa da. Gure gorputzen, komunitateen eta lurraren iraunkortasunerako ezinbestekoa da; hau da, bizitza, ongizatea eta osasuna iraunarazteko eta kudeatzeko beharrezkoa.
Euskal Herrian, egun, zaintzarako zerbitzuak gero eta pribatizatuago daude. Azken 20 urteetan, euskal instituzioetatik sistematikoki pribatizatu dira ahal izan diren zaintza-zerbitzu guztiak, enpresa lagunen eskuetan jartzeko eta horietatik milioi askotako etekinak ateratzeko, zaintzaren kalitatearen eta langileen lan-baldintzen kontura.
Familia heteropatriarkala erdigunean jartzen duten politikak erabiltzen ari dira zerbitzu horiek ez garatzeko; berriro ere, zaintza lanak emakumeon gain daude, eta sarritan emakume migratu arrazializatuengan. Sistema kapitalista eta heteropatriarkala izateaz gain, arrazista baita. Arduradun horiek izen abizenak dituzte eta gure bizitzen gainetik kapitala jarri dute.
Guk zaintzarako eskubide kolektiboaren aldeko apustua egin nahi dugu; hau da, pertsona guztiek, bizi osoan zehar, askatasunez eta konpromisoz, zaintza eskaintzeko eta jasotzeko duten eskubidearen alde egin nahi dugu.
Zaintza lanen egungo antolamendu soziala eraldatu nahi dugu, eta horrek dakar bi planotan pentsatzea eta aldaketak eragitea:
· Alde batetik, premiei erantzutea, hau da, egun, prekarioen eta kolapsatuen dauden egoerei aurre egitea.
· Bestetik, epe luzera begiratzea eta bizitza erdigunean jarriko duen sistema sozial bat imajinatzea eta definitzea, sistema kapitalista, arrazista eta heteropatriarkala gaindituko dituena.
Greba Feminista Orokorra Euskal Herriko Mugimendu Feministatik abiatu eta herri mugimendu, sektore eta eragile gehiagorekin elkarlanean josten ari garen prozesua da, horren isla da Herri Akordio hau. Grebara eramango ditugun epe luzeko zein epe motzeko aldarrikapenak bildu ditugu guztion artean. Mugimendu Feministal aldarrikatzen duen herri eredurantz urratsak emateko oinarri gisa ulertzen dugu Herri Akordioa, mugimendu sozial eta sindikalekin batera adostua.
Jarraian jaso dira, beraz, momentuz bildutako aldarrikapenak. Batetik, epe laburrera markatzen ditugun lehentasunak; eta bestetik, epe luzera markatzen ditugunak:
1. Zaintza duinen unibertsaltasuna eskubide gisa aitortzea eta bermatzea.
2. Zaintza sistema publikoa indartzea eta garatzea.
3. Zaintza zerbitzuen pribatizazioa amaitzea.
4. Etxez etxeko laguntza zerbitzua indartzea eta garatzea.
5. Atzerritartasun legea bertan behera uztea, eta bitartean, zaintza langile guztiak erregularizatzea.
6. Erroldatzeko eskubidea guztiontzat eskuragarri izatea.
7. Etxeko langile egoiliarren erregimena desagerraraztea.
8. Etxeko langileak lan-erregimen orokorrean sartzea: Lanaren Nazioarteko Erakundearen 189. hitzarmena bere osotasunean berrestea.
9. Etxeko langileei gutxieneko soldatatik gorako lansaria ezartzea.
10. Zaintza sektoreko langileen lan baldintzak hobetzea.
11. Zaintzaileei laguntzeko sareak sortzea.
12. Zaintzeko denborak bermatzea: lanaldia murriztu soldata txikitu gabe.
13. Gizonak interpelatzea, ez zaintzearen pribilegioari uko egin diezaioten eta zaintza lanetan ardura har dezaten.
14. Zaintzeko baimenak zabaltzea eta handitzea: loturagramak.
15. Zaintza lanak transbersalki lantzea: hezkuntzan, osasungintzan eta lan eremuan, besteak beste.
16. Denontzako pentsio duinak ezartzea: 1080 eurokoak gutxienez.
17. Agroekologia babestea eta sustatzea.
18. Etxebizitza eskubidea bermatzea: merkatuan esku hartzea.
Epe luzera markatzen ditugun lehentasunak:
19. Zaintza sistema publiko-komunitarioa garatzea: aldaketa kultural handi bat eskatzen du eta transbertsalki momentu oro landu behar da (zaintzaren kulturaren kontzeptua jorratu eta zaintzen politizazioa zein kontzientzia bultzatu, familia heteronuklearra suntsitu, gizonei ardura exijitu, hezkidetza sustatu eta zaintzan oinarritutako eredu pedagogikoa garatu).
20. Lanaren banaketa sexual eta arrazista amaitzea.
21. Herri antolaketa feminista bat garatzea: espazioen diseinua, denboraren erabilera eta hirigintza -etxebizitza komunitarioak- eraldatu, elikadura burujabetza bultzatu, eta horren bidez hirien eta landa eremuaren arteko harremanak eraldatu.
22. Arrazakeriaren eta biolentzia instituzionalaren aurka borrokatzea.
23. Herri boterea eta gobernantza eredu berriak eraikitzea.
Horiek dira orain arte jasotako eta adostutako aldarrikapenak. Bide honetan, funtsezkoa izango da pedagogia feministetatik, gure subjektibotasunean aldaketa sakonak sustatzea. Zaintzekiko konpromisoak nahiz erantzukizunak hartu behar dira, eta lanaren banaketa sexual eta arrazista desegin. Zaintza, premia eta eskubide kolektibo gisa hartuta, bizitza osoan zehar.
Horregatik, erantzukizuna eta konpromisoa exijitzen diegu dagokien arduradun politikoei. Egoera hau sostengaitza da eta horren arduradunek izen abizenak dituzte. Azaroaren 30ean greba egingo dugu Euskal Herrian, herriz herri eta asanbladaz asanblada ari gara antolatzen, zaintza sistema publikoa definitzen eta gure bizitzak politizatzen. Denon bizitzak erdigunean jartzeko prozesua da hau eta horri ekingo diogu. Zaintza eskubide kolektiboaren alde! Azaroaren 30ean GREBA FEMINISTA OROKORRA!