Ostalaritza eta Kolektibitateetako patronalen aurrean hemen negoziatzeko eskubidea defendatu dugu gaurko epaiketan

Kolektibitateko langileei beraien eremuan negoziazio kolektiborako eskubidea ukatzeak lan baldintzen estatalizazioa eta kaskartzea dakartza.

Kolektibitateetako langileek beren lan baldintzak hemen negoziatzeko eskubidea defendatzeko bide guztiak erabiliko zituela esan zuen LABek, eta gaur, urtarrilak 31, horixe bera defendatu du epaitegietan. Edonola ere, sindikatuak oso argi du eztabaida hau, juridikoa baino, politikoa ere badela. Azken lan erreformek negoziazio kolektiboa estatalizatzeko apustu argia egin dute. Neurri horrek patronala saritzen du eta sindikatuon ordezkaritza desitxuratzen du, eta hor dago egoera honen gakoa. Bertan negoziatzeko dugun eskubidea dago jokoan. Bada, langile hauei eskubide hori egikaritzea oztopatzen zaien egun bakoitzeko, beren lan baldintzetan atzera egiten ari dira, kolektiboa zatitzen ari da eta geroz eta langile gehiago daude lan egoera desberdinetan, horietako asko estatuko hitzarmenen menpe daudelarik. “Aldi berean, sektore honetako lan baldintzen estatalizazio eta prekarizazio prozesua azkartzen ari da”, ziurtatu du LABeko koordinatzaile nagusi Garbiñe Aranburuk, elkarretaratzean parte hartu baitu. Horrez gain, patronalen jarrera “salagarria” dela uste du: “EAEn negoziazio esparru bat ireki nahi ez izateko arrazoi bakarra da estatalizazioaren eta lan baldintzen uniformizazioaren alde egitea, langileen kaltetan betiere”.

Estrategia estatalizatzaile horren atzean patronala eroso dago, baina baita CCOO eta UGT bezalako sindikatuak ere, koordinatzaile nagusiaren arabera: “Gure lurraldean negoziazio kolektiborako berezko esparrua defendatzeko Lanbidearteko Akordio sinatzen dute, baina aldi berean, Madrilen, eremu txikiagoetan negoziatzea zailtzeko klausulak sartzen dituzte estatuko hitzarmenetan”. Estrategia honen aurrean herri bezala erantzun behar dugula uste dugu, eta horrela adierazi diegu azken asteetan egon garen alderdi ezberdinei: salatu dezatela patronalaren jarrera ukatzaile hau, ditugun eskuduntzak muturrera eman ditzagula gure lan baldintzak guk geuk arautzeko, eta oztopoen aurrean, bila ditzagula bide berriak herri bezala hemengo negoziazio kolektiboa babesteko.

Hori da gaurko epaiketan dugun helburua: hemengo negoziazio kolektiborako eskubidea, injerentziarik gabekoa, aitortzea. Lan Harremanetarako Euskal Esparrua aitortzea. Azken finean, Lanbidearteko Akordioari balio juridikoa ematea, gure eremuko hitzarmen kolektiboak lehenetsiz. “Madrilen inposaketa horrek ez du errespetatzen emakume hauen negoziazio kolektiborako eskubidea, ezta sektorean dagoen ordezkaritza sindikala ere. LABeko kideok urraketa horri aurre egiten jarraituko dugu ekintza sindikalaren, mobilizazioen, salaketa juridikoen eta interpelazio politikoaren bidez”, azaldu du Aranburuk.