Azken egunetan sarritan galdetu digute Corrugados Azpeitiaren balizko irekieraren inguruan, eta LABek ezer gutxi esan du orain arte. Izan ere, nekez baloratu dezakegu ezagutzen ez dugun hura. Partaidetzaren aldarria hitzetik hortzera darabilte patronalek eta instituzioek, baina hitz hutsak besterik ez dira izaten. Corrugados Azpeitia irekitzeko ustezko proiektu horren berri ez zaie bertan lanean aritu ziren langileei eman, ezta sindikatuei ere. Langileon bizitzaren inguruan aritzen dira langileekin eta sindikatuekin kontatu gabe. Horregatik, gardentasuna exijitzen dugu: alderdikeriak utzi eta mahai gainean jar dezatela aurkeztu omen den proiektua. Guk, ikusi arte ez dugu sinestsiko.
Industria politika ezaren ondorioak larriak dira gaur egun, baina norabidea aldatu ezean okerragoa izango da etorriko dena. Azken urteetan industriak pisua galdu eta galdu ari da. Esaterako, manufaktura industriako lantegien %20a galdu da azken 12 urtetan. Diru publikoarekin sortutako proiektuak kanpoko funtsen esku gelditzen ari dira eta inbertsio berriak erakartzeko ahaleginak porrot esanguratsuak jaso ditu, azkenengoa Iberdrolaren eskutik. Propaganda bai, ugari, 4.0. propaganda ere bai, baina estrategiarik ez.
Egoeraren larritasunari aurre egin beharrean, interes partidistak gailentzen ari zaizkio industria politikari. Harriduraz eta auzolotsaz entzun dugu Arantxa Tapia existitzen ote den ez dakigun proiektu bateko lanpostuen defentsan.
Ez dugu ahaztu behar duela 8 urte bazen proiektu bat, Azpeitian lanpostu duinak zituena eta bidegabeki itxi zena. Zer egin zuen Eusko Jaurlaritzak 300 lanpostu horiek  salbatzeko? Jaurlaritzaren kexu bakarra itxieraren berri aurretik jakin ez izana izan zen. Itxiera prozesuan langileei bizkarra eman zien gero.
8 urte igaro dira eta lan erreformaren eraginez lanpostuak suntsitzen edo azpikontratatzen dira enpresek gehiago irabazteko. Lan erreforma industria ehuna suntsitzeko makina da. Adibideak ugariak dira: Tubacex, Aernnova, ITP-Aero, Alestis… non dago industriaren eta enpleguaren aldeko defentsa kasu horietan? Antza denez, Europako funtsetatik ekarpenak egin behar dizkie Jaurlaritzak enplegua suntsitzen duten enpresei. Enplegu horiek ez al dute balio?