2024-09-20
HomeZerbitzu PublikoakOsasungintzaMugicaren dimisioa beharrezkoa zen, baina berandu heldu da eta ez da nahikoa

Mugicaren dimisioa beharrezkoa zen, baina berandu heldu da eta ez da nahikoa

LABen irudikoz, Osakidetzako Zuzendari Nagusiaren dimisioa berandu heldu da, eta ez du inondik inora bermatzen EPEko filtrazioen eskandalua eta erakundeko barne egoera kaotikoa konponduko direnik.

Berandu heldu dela diogu, udan baino lehen hainbat kategoriatako filtrazioak salatzen hasi ginen lehen momentutik argi gelditu zelako arazoari aurre egiteko zuzendaritza honen gaitasun falta. Zero minututik Darpon eta Mugica eskandalua estaltzen aritu ziren, iritzi publikoaren aurrean gezurretan ibiliz, beste gauza batzuen artean, LABek helarazi zien txostena ukatuz.

Era berean, dimisio honek ez du bermatzen ezer aldatuko denik Osakidetzan. Lehenengo eta behin, Mugicarekin batera Darponek ere dimisioa aurkeztu behar zuelako. Bigarrenez, oraindik argitzeke dagoelako EPE prozesuetako filtrazioen trama ustela. LABen iritziz, EAJk dimisioa erabili nahi du arreta filtrazioen arazotik desbideratzeko eta, neurri berean, oposizioaren eskaera batzuk asetzeko eta Eusko Legebiltzarrean sortu litekeen ikerketa batzordea bertan behera uzteko.

Bestaldetik, Mugicak utzitako kargurako Juan Diego Casals izendatu izanak argi eta garbi adierazten du EAJren apustua ez dela Osakidetzarako kudeaketa demokratiko eta garbia. Guztiz alderantziz, Diego jaunaren profila bat dator EAJ alderdian hain errotuta dagoen kudeatzaile mota batekin, pentsatzen dutenak enpresa publikoak euren kortijo edo batzokia dela. Honen harira, gogoratu behar dugu Juan Diegok EITBko zuzendaritzan egin zuen kudeaketa negargarria, aldi berean EITBek azpikontrataturiko enpresa baten zuzendaritzan zegoen bitartean. LABek epaitegira eraman zuen Juan Diego eta epaile batek inputatu egin zuen, diru publikoaren erabilera maltzurra eta delitu sozietarioa leporaturik. Prozesua artxibatu zuten azkenik, baina frogatuta geratu zen diru publikoaren erabilera okerra gertatu zela.

Beraz, Mugicaren dimisioaren aurrean ez daukagu zer ospatu. Jarraitzen dugu filtrazioen iruzurra argitu gabe, jarraitzen dugu errudunak seinalatu gabe, jarraitzen dugu Darpon jaunak bere erantzukizun politikoa onartu gabe, eta badaukagu kudeaketa gardenik egiten ez duen Zuzendari berria.

Panorama honetan, LABek ikertzen, salatzen eta mobilizatzen jarraituko du Osakidetza gardena, demokratikoa, publikoa, kalitatezkoa eta euskalduna lortu arte.
 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.